سالي خالد تكتب: العالم مش فاضي دا "إحساسك"

ممكن جدا تحس ان العالم فاضي من حوليك لمجرد ان في شخص واحد مش معاك و مجرد حضور الشخص ده كأن الدنيا كلها بقت معاك .. الانسان مش عايز من الدنيا الا حد واحد بس يفهمه و يحس بيه يسمعه و يقدره و يشاركه كل تفاصيل حياته .. 
الحياة ولا حاجة من غير ونيس في مننا ناس بتيجي الدنيا و تمشي لوحدها لانها ملهاش حد ممكن يكون ونيسها في دنيتها ممكن يبقي عندها الدنيا كلها لاكن مش قادرة تستمتع بيها لمجرد انها وحدها ..


و بالرغم من اننا بنيجي الدنيا دي نلقي ناس كتيرة جدا حولينا بنعرف ناس و نحس انهم دنيتنا كلها و فجأه تلقاهم مشيوا فتستغرب بس لازم تفهم انه مشي عشان مش ده اللي يستاهل يبقي ونيسك ..

الونيس هو الشخص اللي هيستحم عيوبك قبل محاسنك اللي هياخد بأيدك عشان تبقي احسن هيوقفك علي رجلك لما يشوفك بتغلط هيوقفك مش هيسمحلك في يوم تزعل و لو زعلت مش هيهدي الا لما يفرحك ..

مش اي حد يدخل حياتك يستاهل يفضل فيها حافظ علي قلبك للناس اللي بتخاف عليه مش مهم يبقي واحد بس المهم يبقي بيحبك بجد مش بيقضي شوية وقت يعدي بيه فتره في حياته 
واعترف اني انا نفسي محظوظة لان الله –سبحانه و تعالي- مش بس اداني ونيس واحد ده اداني كتير اوي و دي من اكبر نعم الله عليا


خد بالك كويس اوي وانت بتختار الناس في حياتك لان الناس هما اللي بيخلوا للحياة معني و لو رفيق رحلتك مينفعلكش الرحلة هتبقي صعبه اوي عليك و علي فكرة الرفيق و الونيس مش لازم يبقي الحبيب الرفيق ممكن جدا يبقي جد .. أم .. خالة .. صديقة .. صديق .. أب .. جار .. عمة و لو انت محظوظ يبقي رفيقك كل دول ..
و في النهاية ربنا هيحفظ علاقتك باللي يستاهل يكون في حياتك .. اطمن