ندى البرادعي تكتب: أرسم خط وامشي عليه!

ممكن البعض ياخد العنوان على انه تريقة، بس بجد عايز تنجح "أرسم خط وامشي عليه"، معظم الوقت لما بتكلم مع اي حد بيبق نفسهم في مليون حاجة بس مبيعملوش ولا خطوة توصلهم لحلمهم دا، عايزين كل حاجة على الجاهز تخبط على باب بيتهم.

يعني لو واحد نفسه في شغل مبيدورش على فرصة عايزها هى اللي تدور عليه وتجيله ومش بعيد يكون عايزها تتحايل عليه شوية كمان عشان يتواضع سيادته ويقبالها، ساعتها ببق عايزة اقولهم فوقوا احنا مش في يوتوبيا، وبابا نويل مبيجبش للأطفال الشاطرين شغل كل يوم الصبح وهو جاي يزورهم، من الآخر لازم تتمرمطوا شوية، آه والله!!

وعلى النقيض اللي عندهم استعداد يبيعوا اي مبدأ من مبادئهم بحجة إن الشغل اللي يروح مبيجيش غيره، لا والله الشغل اللي بيروح هتتعب شوية بس هتلاقي غيره، اما المبدأ اللي هيروح مش هتعرف ترجعه تاني، متخسرش نفسك ربنا اللي بيوزع الأرزاق وطول ما أنت بتتوكل ورزقك في إيده متخفش.

ومن المواقف اللي بتقابلني وبقف قدامها كتير برضه لما اتنين يبق جواهم مشاعر لبعض، بس كل واحد خايف من رد فعل الطرف التاني وخايف يخسره فبيسكت، لحد ما الاثنين يقرروا يبعدوا ويعيشوا الجرح، مع انهم محاولوش يوصلوا لبعض حتى، الدنيا مبتوزعش فرص كل يوم على فكرة عشان تضيعوها.

بإختصار الإنسان بطبيعته متطرف، معندوش وسط ليكون مندفع جداً بدون تفكير، ليكون بيفكر وقت زيادة عن اللزوم فبيضيع الفرص اللي في إيديه!

وعشان كدة الحل خليك وسط في كل حاجة وأرسم خط وأمشي عليه!