سالي خالد تكتب: محتاجلك و محتاجلي

في ناس كتير اوي في الدنيا تستاهل منك وجودك .. انت ممكن متبقاش حاسس بقيمتك و فاكر ان محدش معاك ولا بيحبك تسيب نفسك للاكتئاب و تعزل نفسك و تقفل تليفونك و تغيب عن الدنيا و تبقي متأكد ان مفيش حد هيحس ولا هيدور فينك عشان محدش يهمه ..
و فجأة يحصل اللي مكنتش متخيله وتلقي الناس كلها حست بتقول فينه و حصله ايه و فين غاب تلقي سؤال من اللي قريب منك و اللي مش قريب من اللي ساكن جنبك و اللي بينك و بينه اميال واللي في بلد تانية و تتقلب الدنيا تتدور عليك قصاد صدمة منك معقول انا كل دول بيحبوني ..

وانت برضو حوليك ناس قد كده بتحبهم لو غابوا فجاة هدور و تقلب الدنيا عليهم ..
عشان كده مش لازم نغيب عشان نحسس بعض بقيمة بعض في الحياة مش لازم تقفل الموبيل و النت عشان حد يحس مش لازم نحس باللي حولينا لما يغيبوا عننا ..
دايما خليك متواصل مع كل اللي حوليك متوصلش اللي بيحبوك انهم يحسوا انهم مبقوش مهمين في حياتهم فيختاروا يغيبوا عشان يحسوا بالحب ده مش لازم يسكوتوا عشان تتكلم ..

مش هتخسر حاجة لما تصحي تصبح علي الكل .. كلمهم فجأة و قولهم انهم مهمين في حياتك .. صورة حلوة فيها بتتضحوا متكتبش عليها حاجة حط قلب و خلاص هتوصل ..
من غير ما نقصد بنوجع قلوب بنحبها و بتحبنا بأهمال مش مقصود حاول دايما تحافظ علي الناس اللي وجودك معاهم بيفرق مع الناس اللي بتقدر تكون معاهم علي طبيعتك من غير ما تتكسف او تلبس قناع متسبهمش يبعدوا و يفتكروا انك نسيتهم متسبهمش لحد ما فجأة يختفوا و ساعتها مش هتعرف تلقاهم تاني