ندى البرادعي تكتب: مبنكرهش "الحب" ... بس مبندورش عليه!

ديما لما كنت اسأل صحباتي البنات نفسكوا في ايه، يقولولي نفسنا في الفارس اللي هيحللنا كل مشاكلنا وكأنهم مكتوب عليهم يعيشوا فيها لحد ما يلاقوه!!

ومن هنا اتأكدت إني مش زيهم، أنا مبدورش على اللي هيجلي راكب حصان أبيض ويبق معاه حل لكل مشاكلي وأنا ابقى زي الأميرة مبعملش حاجة غير إني بفكر هلبس ايه بكرة الصبح بس.

أنا متولدتش سندريلا، اتعلمت وكبرت وبقيت بعرف اروح وأجي، ولو جزمتي وقعت أكيد مش هخاف إني ارجع اجيبها، وفي بنات كتير نفس مقاس جزمتي "اعتقد يعني"، فمش هى اللي هتميزني عنهم.

ديماً لما بتكلم بوجهة النظر دي بتفهم غلط، وإني مش مقدرة قيمة الحب إلخ إلخ إلخ، لا بالعكس أنا مقدراه كويس أوي، بس لما يكون حقيقي مش إحتياج ليه أو بتملى فراغ لأنك ملقتش الإنسان الصح اللي تحبه لحد دلوقتي، بمعنى إني مش عايزة حصان ابيض "قدم اوي الحوار دا"، أنا عايزة يوم ما أقول أنا حبيت يبق في إحترام وتفاهم وود يعيش معايا العمر كله.

مش هو اللي يحللي كل مشكلة، ولما هو يبق في مشكلة ابق انا فص ملح وداب لإني انا البنت، عايزاه يستقوى بيا زي بالظبط ما أنا هستقوى بيه لما ألاقيه.

مش عايزة أكون بدور عليه أو هو بيدور عليا، عايزاه يتخبط فيا ويتفاجئ، الموضوع دا مش تخطيط يا جماعة.

الحب يعني إنك تتخبط فجأة في حد مكنتش تتوقع إنك هتحب في يوم واحد شبهه، ومتفوقش ابداً من الإحساس دا لإنه هيكون استعمرك من جواك وقررت تستحمل الشخص دا على بعضه.

تشوفه وهو لسه صاحي من النوم ومتتريقش عليه، تحبه بأسوء حالاته قبل أحسن حالاته، تستحمل الدومات اللي هتدخلوا فيها عشان الحياة مش سهله.

بإختصار احنا مبنكرهش الحب، بس مبندورش عليه .... عايزين نتفاجئ بيه!