سالي خالد تكتب: عن صورة!

الصور .. 
في لحظة بتفتح الكاميرا و تلتقط صورة لحظة بيوقف عندها الزمن لحظة مش ممكن في يوم تموت .. 
الايام هتمر و في يوم هتلقي الصورة فجأة جت قدامك في لحظة هتيجي في بالك كل حاجة اليوم بتفاصيله الصغيرة قبل الكبيرة الضحكة اللي مرسومة علي وشك الحضن اللي حضنه ليهم هتفتكر مين اللي جري و قال مش هتتصوروا منغيري هتفتكر مين اللي قال بلاش النهاردة شكلي وحش هتفتكر كل حاجة .. 
هتنزل من عنيك دمعة دمعة بتحكي عن شوق لوجودهم شوق لضحكتكم شوق لراحة البال و السلام شوق لدنيتك اللي كانوا فيها وملينها عليك ضحك و فرحة .. شوق لايام كانت فيها ضحكتك من قلبك طالعة ماليا الدنيا من حوليك سعادة شوق لقعدكم سوا لحكاياتكم الكتيرة للكلام اللي مكنش بيخلص .. هتتأكد انك كنت في يوم من الايام بجد سعيد ..
الصور .. 
عمر بنرجع نعيشه تاني بكل تفاصيلة .. ماضي قتلنا الشوق ليه ياريته ما في يوم عدي .. مش عارف تضحك ولا تبكي .. اتغيرت اه و كتير اوي كبرت يمكن مبقتش زي ما كنت زمان .. كنت فيها عايش طاير الدنيا مش سيعاك .. 
فينهم .. و ليه الدنيا خدتهم وحشوك اوي و اكيد انت واحشهم كمان خدتهم الدنيا و انت كمان وكل واحد بقي عنده دنيته هي دي الحياة ..
عن ..  ناس كانوا سبب في سعادتنا .. عن ناس ضحكنا معاهم بكينا معاهم عن ناس خلوا للمكان روح و لحياتنا الوان و معاني عن ناس ذكريتنا معاهم هي اجمل شئ حصل لنا عن ناس فرقتنا الدنيا عنهم و بنشتاق ليوم واحد من ايامهم عن ناس احلوت بيهم كل حاجة في عيونا الاكل الهزار المذاكرة عن ناس احلوت بيهم الايام  ..
خدوا صور علي قد ما تقدروا مع اللي بتحبوهم الصور هي الحاجة الوحيدة اللي قادرة توقف الزمن عندها قادرة ترجعنا لزمان قادرة ترسم علي وشوشنا بسمة جميلة قادرة تحلي ذكريتنا و تفضل تفكرنا بأجمل ايام حياتنا .. 
عن الصور .