ندى البرادعي تكتب: سبوني لوحدي ... انتوا صدقتوا!

احنا عادةً سواء بنات أو ولاد لما يظهر علينا إننا متضايقين بنبقى عايزين اهتمام من اصحابنا نحس بيه إننا مش في الدنيا دي لوحدنا، بس في نفس الوقت احنا مش عايزين نحكي عايزين إيد تطبطب علينا بس وتقولنا كل حاجة هتبقى أحسن، من غير كلمة معلش ومفيش حاجة تستاهل والكلام اللي الناس بتفتكره بيريح بس هو بيوجع أكتر، لإن مفيش حاجة تستاهل بالنسبة ليك أنت لكن أنا عندي مية حاجة تستاهل إني أكون عايزة احافظ عليها وفجأة ألاقيها ضاعت من إيدي، فأنت متجليش تقول مفيش حاجة تستاهل.

ساعتها بنلجأ لـ أنا عايز أبقى لوحدي وهبقى كويس، سبوني لوحدي ياجماعة، بس لو بصينا لأصل المشكلة هنلاقيها إننا لوحدنا، مفيش حد فاهمنا فبنضطر نلجأ لإننا نبق لوحدنا أحسن ما نبقى وسط ناس مفيش نقطة تلاقي بين تفكيرك وتفكرهم.

بس احنا مش بجد عايزين نبقى لوحدنا، اللي هو احنا لما بنقول سبونا لوحدنا وتمشوا بنبقى عايزين نقلكوا لأ ثانية واحدة انتو صدقتوا؟ -آسفين- طبطبوا علينا بس الكلام دا طبعاً مش بيتقال فبنستسلم للأمر الواقع.

احنا فعلاً كلنا محتاجين الصحاب الرخم اللي تقوله سبني لوحدي، يقولك لأ انا معاك وهسمعك وهحس بيك، وأنا مش هسيبك لوحدك عشان مينفعش تبقى لوحدك لإن أنا ديماً معاك..

أفهمونا بقى