سالي خالد تكتب: العين

العين حزء مهم جدا من الانسان .. من اكبر نعم ربنا علينا من غيرها الحياة بتبقي صعبة جدا يمكن محدش يقدر يعيش من غير عينيه و الغريب في الموضوع ان الناس اللي فقدت نظرها علمتنا ان في نعمة اكبر بكتير من نعمة البصر و هي نعمة "البصيرة" زي ما بيقولوا كده "الحاسة السابعة" ..

ايه البصيرة دي ؟؟ البصيرة دي نور خلقه ربنا في قلب و عقل الانسان عين تانية تقدر تشوف حاجات مفيش حد يقدر يشوفها نور قلب و لسان و عقل حاجات مش موجودة في الحقيقة عايزة "عدسة مكبره" عشان تقدر توضحها و العدسة دي ربنا خلقها جوانا و اسمها البصيرة

 البصر هو نظرة العين انما البصيرة هي نظرة القلب و الفرق كبير .. يا مكتر الناس اللي عندها عيون بتبصر لاكن قليلين جدا اللي عندهم بصيرة ..

مش كل شئ قدامك انت شايفه بعنيك معناه انك شايفه  مش كل بني ادم قدامك عينيك شايفة حقيقته .. العين سهل تتخدع من المظهر اللي قدامها لاكن البصيرة صعب جدا انها تتخدع لانها دايما شايفة الحقيقة المستخبية ورا المظاهر الخداعة .. 

مش كل كفيف عاجز عن النظر و مش كل مبصر قادر يشوف .. ده العين لو نورها اطفي مش معناها ان القلب كمان بقي ضلمة لو البصيرة ملياه هيفضل منور هيفضل يلهمك و يعرفك مين بيحيك مين صحبك ايه وراك و ايه قدامك .. 
و زي ما قال محمد صبحي في وجهة نظر "الشوف الحقيقي مش نظر الشوف الحقيقي وجهة نظر" ..