سارة سامي تكتب: فسخت خطوبتها !

رنا : سارة الحقينيي !!!! 
سارة: مالك يا حببتي في ايه بس ؟؟؟!!!
رنا : انا فسخت خطوبتي !! 
سارة : نعم !!!!! ايه اللي حصل بس اهدي كدة و صلي على النبي و احكيلي . 
(بعد ما شكت رنا لسارة و سارة سمعت متكلمتش )
سارة : طب استهدي بالله و قومي إتوضي و صلي و حملي حمولك كلها على ربنا و خليكي واثقة و متأكدة إنه ربنا إذا أحب عبدا إبتلاه و ربنا سامعك و عارف كل اللي حاسة بيه ادعي و اللحي عليه في الدعاء و بالذات ونتي ساجدة و ربنا مشحيخذلك ابدا .
رنا : بس انا موجوعة أوي بجد حاسة إني بموت و إن الدنيا إنتهت بالنسبالي و إتعقدت خلاص . 
سارة : رنا !! 
رنا : نعم .
سارة : مفيش حلاوة من غير نار و هاتيلي حد متوجعش من الحب ولا نام على مخدته و هو مبيفكرش في حد عزيز عليه مبقاش في حياته . بصي لو كل اللي حبوا و فارقوا  اللي بيحبوهم وقفوا و قعدوا يبكوا على اللي فات مكنتش الحياة إستمرت . ربنا بيعلمنا من كل حاجة بتحصلنا و بنستفيد و حتستوعبي كدة مع الأيام . أنا عايزاكي تعيطي و متكتميش في نفسك دمعة واحدة خرجي كل الحزن اللي في قلبك و أثناء دا كله إستخيري مش يمكن ربنا يرجعهوك تاني !! 
 إدعي و قولي يا رب ريحلي بالي و قلبي و إشفيلي كل وجع و إخترلي الخير عاجلا غير آجلا يا رب العالمين .
رنا : سارة !! أنا بحبك أوي بجد ريحتيني شوية ونا كنت على أخري . 
سارة : إنتي متشكرنيش أنا إشكري ربنا اللي حطني قدامك و هداني بكلامه و قلتهولك مسيري أقع أنا كمان في يوم في أي مشكلة و أحتجله و يسخرلي حد يفوقني بكلامه  . 
رنا : بس أنا مستغرباكي ليه مقولتليش سيبك منه إنتي تستهلي أحسن منه و الكلام دا !!!
سارة : يا رنا إوعي تسمعي كلام حد يقولك لأ طبعا هو الغلطان ونتي قليلة و الكلام الفاضي دا لأن لا يصح إنك تسمحي لأي مخلوق يحكم على موقف من سماع طرف واحد بس للمشكلة و إلا يبقى بيظلمك انتي و الطرف التاني و بيخرب عليكوا من غير قصد . و حتى يا ستى انا لو اتكلمت مع خطيبك انا ميحقليش احدد الغلطان فيكوا .
رنا : ليه بقى منتي سمعتي المشكلة لازم تحددي مين الغلطان عشان يتأسف للتاني !!!
سارة : برده متخلقش اللي يغلط حد فيكوا عشان أي خلاف في الدنيا لو حكيتيه لميليون واحد حتسمعي كل واحد برأي شكل و دا في حد ذاته ظلم ليكوا . يا رنا محدش يحل مشاكلكوا غيركوا إوعي تدخلي حد بينكوا عشان دي أول خطوة لإنهيار العلاقة . 
رنا : تصدقي عندك حق !
سارة : يلا روحي صلي و ربنا يهديكي للخير و ييسرلك إمورك .