سالي خالد تكتب: حب الناس وكفى!

حب الناس هو نوع من انواع الهدايا الربانية من الله للانسان علي الارض و هو علامة لحب الله للعبد فالله اذا احب عبد حبب الناس فيه ..
حب الناس مش محتاج منك انك تبقي انسان علي طول بيهزر و بيضحك الناس ولا عايزك تبقي منافق .. 
حب الناس عايز شخص لسانه طيب شخص مبتسم شخص ماشي بيوزع طلقة اجابية علي اللي حوليه ..
الكلمة الطيبة صدقة الابتسامة صدقة الستر علي الناس صدقة كل معروف صدقة ..
لو قادر تسمع حد محتاج تسمعه اسمعه لو قادر تشيل عن حد هم و تهون عليه شيل لو قادر تبتسم ابتسم دي حاجات بسيطة مش هتكلفك اي حاجة بس مقابل ده كله حاجات كبيرة اوي ..
افعال بسيطة قادرة تغير كل حاجة من حولينا ربنا جعل مع كل خير صدقة و جزاء فعل الخير قادر يغير حياتك 180 درجة و يلين قلبك و يصفي نيتك ..
خد بالك من كلامك و جربه علي نفسك قبل ما تقوله لحد لو قدرت تستحمله قوله و لو مقدرتش اسكت "فل تقل خيرا او لتصمت" .. 
لو مش قادر تتصدق بالمال اتصدق بالكلمة الطيبة و الابتسامة اجمل بكتير من اي حاجة ..
لو قابلت شخص اساء ليك اصمت مش عشان انت ضعيف لا عشان انت اقوي منه بصمتك لانك عصمت لسانك من الخطأ قابل الاساءة بالحسنة عشان منزلتكك عند ربنا تعلي ..
لو حد جه و حكالك حاجة خاصة عنه بانكسار اسمعه و احترم اختياره ليك احفظ سره و استره من عيون الناس اللي مبترحمش و اوعي تكون سبب في نشر فضيحة مهما كان عشان انت مش عارف بكره في ايه و منتاش عارف ايه ممكن يحصلك و ساعتها ربنا هيبعتلك اللي ياخد حقه منك ..
لو قادر تحل لحد مشكلة حتي لو متعرفوش حلها و متتأخرش ..
لو فضلنا نتكلم عن كل الخير اللي ممكن نعمله في الدنيا مش هيخلص ابدا لان الخير موجود محتاج اننا نظهره اكتر و نقويه اكتر و لان الانسان مسيره في يوم يروح صدقني مش هيبقالك الا سيرتك بعد مماتك خليها خير دايما و متستقلش بفعل الخير حاجات صغيره مبتكلفناش اي حاجة لاكن لو فكرت ممكن تعمل ايه مش هتصدق ..
خلي سيرتك تتكلم عنك خلي افعالك تحكي خلي تربيتك تعرف الدنيا انت مين مش عيب اننا ندور علي حب الناس لاكن ندور عليه صح و مش هتكسب حاجة لو عشت وحيد و خسرت الدنيا لمجرد انك فاكر ان الناس ملهمش لزمة في الحياة احنا جينا عشان نعيش مع بعض و حتي لو في ناس وحشة فالحلوين مالين الدنيا و الخيراللي هتعمله هيخلي اللي قدامك حتي لو كان ايه يجي عندك و يقف ..
سارعوا للخير لان الدنيا محتاجه له و قلوبنا بتعيش بيه و ربنا بيبارك فيه و في النهاية محدش عارف مش يمكن حسنة وحدة تكون السبب في دخولك الجنة .