إسحاق شهدي يكتب: Feeling good

feeling good - تغيير المود :

- بمناسبة الأجازات . مافيش حد مابيحسش من وقت للتاني بالملل و الزهق.

و بدون مناسبة . مافيش حد مابيتعرضش في حياته اليومية لمواقف تضايق. أيّا كانت درجة الضيق اللي بتسببها ، و أيّا كان مصدرها سواء من ناس حواليه او من الشغل و مشاكله او من صعوبة بعض تحديات الحياة .

- تفتكر ايه حل الحالات دي ؟ . حاول كدا تسيب الموبايل او الكمبيوتر ، و فكّر  شوية قبل ما تكمل قراية .

- فكّرت ؟ .. طيب

الحقيقة يا عزيزي إن الإجابات علي الأسئلة دي يمكن تكون مش هيّ أكتر حاجة مفيدة . لأن غالبا أي إنسان بيكون عنده إجابة . ماحدش بيقف ساكت قدام حالة الـ off mood دي . و كلّه ممشي حاله !

طيب انت شايف ايه هي أكتر حاجة مفيدة ؟

أكتر حاجة مفيدة من وجهة نظري هيّ  إدراك الإجابة الحالية .

الإجابة الحالية ، هيّ إجابتك . هيّ اللي انت عايش بيها كـ أسلوب تعامل مع أي مشاعر سلبية أو مواقف صعبة . هيّ القانون اللي عقلك بيطبقه تلقائيا قصاد أي مشكلة بتسببلك ضيق أو خنقة .

- طيب ليه إدراكها هو أكتر حاجة مفيدة ؟

الطفل لما بيعمل بيبيه علي روحه، أول حاجة بيعملها قبل ما يعيط هوّ إنه بيحس انه عمل بيبيه علي روحه . بعد كدا يعيط و تيجي ماما تغيرله و يبقي زي الفل و يرجع تاني يضحك و يتف علي عمو - اللي كان لسة عاملها عليه من شوية- ما علينا من الطفل دا . و عذرا للتشبيه بس الحقيقة مالقيتش أوضح منه .

و الحقيقة كمان إن أبسط بداياتنا في الحياة بتقوللنا : الإدراك هوّ أول خطوات تغيير أي وضع .

- الخبرات الإنسانية من زمان  أثبتت إن الإنسان لما بيحس بـ أي ألم أو قلق أو خوف أو خنقة أو أي مود مش لذيذ. بيحاول يغيّر موده . بيحاول يـ Feeling good ! و تقريبا دا هوّ البيبيه اللي بيعمله أغلب الأطفال، من عمر سنة لـ سبعين .. بس مش كل الناس للأسف بتدرك دا !

- مواجهة المشاعر السلبية بمجرد محاولة تغيير المود هوّ المشكلة الحقيقية . لأنّه تغيير مش حقيقي خالص . سهل أوي لو مخنوق تتفرج علي ماتش وللا تخرج تقابل اصحابك وللا تفتح النت و تتفرج علي كل أفلام السينما الكوميدية اللي نزلت وللا تشغل نفسك بعمل مجتمعي ينسيك نفسك و حالك و كل اللي وراك وللا تدمن مخدرات او علاقات او فيس بوك . سهل اوي . و مودك هايتغيّر فعلا . بس السؤال : بعد ما ترجع قوضتك بالليل ، و تختلي بنفسك . بتحس فعلا بـ ايموشن "فيليتج جود" ؟

- فكرة التغيير اللي محتاجها الإنسان بجد ، مش هي مجرد تغيير المود .

فكرة التغيير اللي محتاجها الإنسان بجد ، تشبه إلي حد كبير اللي بيحصل في ماتشات الكورة . تغيير طُرق لعب ( طرق مواجهتك لمشاكل و تحديات الحياة المختلفة و مواقف الحياة اليومية ) . إضافة عناصر جديدة للفريق من وقت للتاني ( إضافة صفات جديدة علي شخصيتك زي المرح و المرونة و التفاهم و العلاقات الإيجابية ) . عمل معسكرات الإعداد قبل كل موسم ( التخطيط لكل مرحلة ، و كل يوم في حياتك ، و لحياتك بشكل عام  ) . و أخيرا : معالجة الإصابات ( التعامل مع المواقف و الأحداث المؤلمة في حياتك و تغيير المفاهيم للأفضل و الأصح في العلاقات و العمل و قيادة النفس ) .

- تغيير المود اللي بيحصل بخروجة وللا بدردشة سطحية وللا بعادات مالهاش معني وللا إدمانات وللا قتل الوقت و قتل المشاعر معاه ، بيعيش ليوم التلات علي رأي اللمبي . أمّا شخصيتك و طرقك في الحياة و استراتيجياتك في مواجهة تحديات كل يوم . ف هاتعيش معاك طول العمر ، و يمكن في الآخرة كمان بشكلٍ ما .

ماتغيرش المود لـ feeling good .

عايز تغيّر ، غيّر بجد .

غيّر فكرة .. سلوك .. طريقة حياة .

و الأهم من كدا دلوقتي ، افتكر مثل الطفل و الإدراك . و شوف : ايه هيّ طريقتك المعتادة في مواجهة حالة الـ Off mood ؟

من هنا .. من الإدراك ..  تبقي بدأت فعلا مسيرة التغيير . اللي يديلك  راحة حقيقية  بعد و خلال  أي وقت أو موقف  أو  تحدي صعب في حياتك .