ألاء أحمد تكتب: متتحجبيش إلا لو !

انا مبسوطة أوي عشان ناس كتير بدأت تتحجب بعد موضة
 قلع الحجاب الي انا بفسرها  من وجهة نظري التي قد تكون خطأ (زي ما الحجاب فجأة بقى موضة ايام شرايط عمرو خالد و انه كان مأثر في البنات و السيدات قوي برضة الفترة دي بقى قلعة موضة طبعًا مش كل الحالات في ناس اتحجبت اهلها للأسف غصبوا عليها و بنات مكنتش فاهمةيعني ايه حجاب صح اصلًا 
و دا للأسف راجع ان احنا دايمًا بناخد  الحاجة زي ما هي من غير فهم -خاصًا في الأمور الدينية 
في بنات قررت انها يا تلبس الحجاب صح يا تقلعه  كل دا و حالات ثانية و افكار مختلفة كتيييييير متقدرش تحكم عشان مشوفتش كل الحالات و كل وجهات النظر  
النقطة المهمة هنا بالنسبالي ان معظمنا الي ثابتين على الحجاب مش محجبات اصلًا ممكن نسمينا محتشمات أو مغطين شعرنا أو اي مسمى نختاره  -جزء راضي بالي هن في و بيقولوا احنا احسن من غيرنا و جزء تاني  بيقول إن شاء الله هنحسن لبسنا بس لسه مش قادرين ياخدوا الخطوة و في تردد و حيرة و إحساس بالذنب بينتابنا من وقت للثاني  وانا واحدة منهن و جزء عايز يقلع بس خايف من كلام الناس و النظرة المجتمعية لاننا يجب ان نعترف اننا مجتمع عنصري و يهتم بالمظاهر بشدة و دا يلفت نظرنا لنقطة مهمة و هي  للناس الي بتحكم على البنت انها مش محترمة عشان مش محجبة أو قلعت الحجاب  أو بتتعامل على ان البنت الي محجبة دي لازم تبقى ملاك احب اقولك -مفيش على الارض ملائكة-  كونكوا مش عايزين تفهموا دا و بتحللوا الناس على مزاج حضرتكوا سواء انت أو انتِ و او بتبرروا الحاجات الي بتعملوها  تحت اي مسمى أو لو بتحللوا الحاجة عشان انتم بتعملوها  أو بتحللوا و بتببروا الي بتعملوه تحت مبدأ دا ولد و دي بنت فكدا دخلنا في مبدأ اننا لازم نرتقي و نفهم ديننا كويس قوي و برضه نفهم من كدا ان التفكير دا مبقاش مقتصر على موضوع الحجاب بس دا يندرج تحته مواضيع كتير  
اولًا لازم نفهم ان ربنا خلقنا خطائين توابين و مخلقش حد كامل و هو بس الي بيحاسبنا و هو برضه الي بيغفر لنا يبقى حضرتك ملكش حق تحاسب و لا تحكم على غيرك 
ثانيًا لازم نفهم ان البنت مش بيتقاس  اخلاقها كويسة و لا من الحجاب او قلعه  ( لازم نفهم ان البنت دي ممكن قوي يكون معندهاش اي ثقة في نفسها او شكلها أو جسمها و فاكرة ان دا الي هيحليها حتى لو غلط) و دا يرجعنا لمبدأ متحكمش على اي حد معشتش ظروفه و لا دخلت دماغه و للأسف ياما الحجاب والنقاب  مدارين . نبطل احكام ، stereo types & تمثيل المثالية  لان كلنا مليانين بلاوي و ذنوب و اخطاء -حتى كاتبة المقال- 
 المهم نرجع لموضوعنا لو هتتحجبي اتحجبي صح من الأول اوعي توصلي لاي حاجة من الفوق (حيرة ،تردد ....
 متقوليش واحدة واحدة عشان الخطوة بتبقى ثقيلة قوي بعد كده او لو طبعًا لو عندك قدرة على التدرج بس التدرج المنطقي مش تدرج (الليجنر،و التوربان و السبانش و الشابوه والقسة المتر الي برا الشعر  التيشرت ال عند الكامر و الموضات الاخرى )
مش اي موضة لازم تبقى حلوة و تناسبك و تناسب جسمك و لازم تقتنعي برضه ان شياكتك في احترامك لجسمك و انك تصونيه  -هنا يبقى اهلًا بالتدرج- و مش بقول انتقبي أو البسي ملس مثلًا بس الوسط ..الوسط في كل شيء
نوصل هنا ل ايه ؟ 
متتحجبيش غير وانت مؤمنة مش معتقدة
متتحجبيش غير و انت فاهمة كويس جدًا يعني ايه حجاب  
الحجاب ربنا فرضه للسترة و عدم لفت الانتباه عن عمد 
ربنا يهدينا جميعًا و تقدر نصلح من نفسنا و نوصل للنفس المطمأنة الي بيسبقها النفس اللوامة و الحيرة و التردد و الخوف و احاسيس كتير مختلفة و متناقضة