إسحاق شهدي يكتب: سـ سؤال "؟"

س سؤال : 
------------

- بمناسبة الإمتحانات . كتير و احنا بنذاكر، نلاقي جزء صعب في المنهج . و لمّا نسأل : بييجي في الإمتحان بعدد كام من الدرجات ؟ و نلاقي انهم قليلين ، ممكن مانوجعش دماغنا و نذاكره . يمكن تكون الثانوية العامة هيّ الإستثناء الوحيد من دا ، و الله أعلم. 

- لكن اللي مهم نشوفه بوضوح . كحقيقة و واقع ، إن الأسئلة اللي هنواجهها عامّة مش بس هتكون في امتحانات المدرسة و الجامعة . الحياة كمان  عندها أسئلة ليك . 
صحيح لو مجاوبتهاش صح مش هتسقط في سنة يعني وللا هتجيب ملحق ولا حاجة، بس أكيد مش هتعيش مبسوط . علي الأقل في مجال التساؤل دا . إن كانت علاقاتك أو حياتك الداخلية أو العائلية أو حتي في اختلافك مع غيرك . 

- كُل عُمر ، مرحلة سنيّة ، بيبقي ليه أسئلة . و علي حسب تقسيمة بعض كتب علم النفس ، ممكن نقول إن حياة الإنسان متقسمة 8 مراحل : 
الرضيع - ما قبل الحضانة - ما قبل المدرسة - ابتدائي - المراهقة - النضج - منتصف العمر - الشيخوخة . 

- لمّا تقرا شوية عن مرحلة المراهقة ( من 12 لـ 20 سنة ) ، تلاقي دايما الأسئلة اللي بتواجه الإنسان فيها رايحة في اتجاه واحد : أنا مين ؟ 
و هتلاقي دايما فيه صراع اسمه "صراع الأدوار .. Role confusion " . 
بيفرق أوي في المرحلة دي إن المراهق يشوف مثل أعلي . أو صداقة ايجابية . هنا تقريبا بيلاقي اجابات علي اغلب الأسئلة، بشكل عملي . 

- و لما تقرا شوية عن مرحلة النضج ( من 20 لـ 40 سنة ) ، هتلاقي دايما الأسئلة بتدون في دايرتين : الحب ( الزواج ) - العمل . 
بيفرق أوي في المرحلة دي إن الإنسان ماينحسرش في نفسه . و بالمقدار اللي يخرج فيه من نفسه، هينجح، و هيعمل علاقات ناجحة . 

- لمّا بتلاقي علي فيس بوك كلام كتير عن الحب ، و بوستات كتييير ، فدا بيدل علي حالة حيرة عامة في سن الشباب ، في اتجاه من 2 بيمثّلوا التحديات الأساسية في سنّهم دا . 

- و لمّا بتلاقي دايما في المراهقين حيرة و أسئلة كتير ، دا لأن السن دا بنكون فيه ماوصلناش للإجابة علي السؤال اللي قبل الأسئلة كلها : أنا مين ؟ 

س : سؤال . 

س : أسئلة كتير . و هتبقي أكتر و أكتر ، لحد ما نحدد أهم سؤال . 

و أهم سؤال في المرحلة دي من حياتك ، هوّ هوّ اللي عاش صراع الإجابة عليه كل الناس قبلك . 

س : سؤال . هاتسأل في ايه ؟ 

- س : سؤال مرحلة الصبا : ازاي نحقق وجودنا و نكون كويسين و ناجحين و وطنيين و مثقفين و فاهمين نفسنا و الناس و الحياة ؟ 
س: سؤال مرحلة الصبا : ممكن يكون لسّة محتاج منّك إجابة شافية كافية وافية في مرحلة النضج .

- س : سؤال مرحلة النضج : نحب ازاي ؟ ازاي تكون علاقاتنا حلوة ؟ هل دا ليه مبادئ ؟ طيب ازاي اختار حد اكمل معاه عمري كلّه ؟ و ايه معني العلاقة الأبدية دي ؟   
س : سؤال مرحلة النضج نشتغل ازاي ؟ و ننجح ازاي ؟ ايه المهارات اللي محتاجها ؟  و ازاي احدد مجال شغل يناسبني ؟ و لما اشتغل ازاي اتطور و ارتقي و اتقدم مع الوقت ؟ 

- س : سؤال . لو طلع بدقّة ، في وقته و مرحلته ، هيبعد عن دماغك دوشة كتيــر .
لأنّك ببساطة ، ماشي في السكة الصح ، بتنمو في الإتجاهات الصح ، و فاهم سؤال حياتك في الفترة دي صح !