إسحاق شهدي يكتب :التيتة .. في العقيدة 1

لو عايز تفهم التيتة  .. في كل حاجة في الحياة الغريبة دي .. اللي ممكن تكون يوم حلوة و يوم مش حلوة .. يوم مؤلمة و يوم مفرحة .. يوم بتفاجئك و يوم روتينية  :

تقدر نقول من الآخر .. إن "التيتة" .. في العقيدة .

العقيدة هيّ أكتر حاجة بتأثر في حياة الإنسان .. و مدي سعادته فيها
بل و في مصيره الأبدي بعدها ... هيّ العقيدة .

- و لما بنقول العقيدة .. فـ احنا بنتكلم عن كل ما يعتقده الإنسان .. مش شرط العقيدة الروحانية ( الدين ) .

بأمارة ايه .. ايه الدليل اللي ورا الفكرة دي ؟

= تعالي نمسك جانبين مهمين في حياة الإنسان عموما .. و في حياة الشباب خصوصا :

1. الحب .

ازاي ما يعتقده الإنسان بيأثر في الحب ؟

أد ما بيعتقد الإنسان في معني الحب أصلا ! . يعني مثلا : ناس كتير عندها عقائد زي:
 "بحبك =  لازقين لبعض "
" بحبك = انت بتاعي .. ملكي "
" بحبك = مابتكلمش حد غيري "
" بحبك = من حقي اتطلع علي كل حاجة بتاعتك .. بدون أي مراعاة لخصوصياتك "
" بحبك = لازم دايما تقوللي اني صح "

فكر كدا في مدي سعادة الناس اللي عندها المفاهيم دي ؟ و مدي راحة الطرف الآخر في العلاقة ؟ و مدي اقباله اصلا عليها ؟!

و عليه ، يبقي مش كل الناس هاتعيش حب بجد ..
عقيدة الإنسان في الحب .. بتعيّشه النوع من الحب اللي بيعتقد فيه .

2. الشغل .

ازاي ما يعتقده الإنسان بيأثّر في الشغل ؟

جوا أي مجال ، الشغل مدارس ..
و أد ما تنتمي لمدرسة تناسب شخصيتك و قدراتك، أد ما تنجح .

اختيارك للمجال الصح .. ممكن مايحتاجش عقيدة قوية غير في امكانياتك اللي ربنا اداهالك و اجتهادك و حبك للمجال . لكن "المدرسة" دي ، هيّ اللي تنجح واحد بنسبة 50 % .. و واحد تاني بنسبة 99 % ! ازاي ؟

مش هانشرح .. علشان مانطولش اكتر من كدا .. بس هانعرض شوية عقائد .. غالبا اصحابها مش بياخدوا بالهم منها اصلا .. بس يوم ما بيعرفوها و بيغيروها ، غالبا نسبة نجاحهم بتزيد ..

" الشغل = تعب و اجتهاد .. تبقي حُمار شغل، تكسب كويس "
" الشغل = تفكير وبس .. لكن ماتتعبش نفسك كتير .. دور ع الحاجة السهلة"
" الشغل = مجال واحد .. لو مامشيتش معاك فيه، اوعي تجازف و تغير مجالك "
" الشغل = واجب بنأديه علشان ناخد مرتب آخر الشهر و نعيش .. نشتغل 8 ساعات في اليوم ، علشان نعيش الـ 8 التانيين قبل النوم ، و مش مهم أي متعة"
" الشغل = task بتعملها .. اوعي تجازف و تدرس ازاي يبقي ليك عمل خاص، و تعمل انت الخطة .. خليك في المنطقة الآمنة " .

في النهاية ..

فكرة واحدة .. عقيدة واحدة بس ، ممكن تعيشك سعيد .. أو تعيس
تعيشك ناجح أوي .. أو نص نص
تعيشك سعيد مع انسانة سعيدة .. أو تعيشك في حالات تاينة كتير من عدم السعادة لمجرد إنك فاهم "الحب" غلط .. أو مرتبط بواحدة فاهماه غلط !


م الآخر .. التيتة، في العقيدة.

فـ خلّي كل عقيدة عندك ايجابية .. سليمة .. خالية من الشوائب

و شوية صفات تانية مُهمة ، و مؤثّرة جدا .. هانعرفها في المقالات اللي جاية .. بـ إذن الله